Жүргізушіні ЖҚЕ теориясын қайта тапсыруға жіберуі мүмкін бес бұзушылық
Жол жүрісі қағидаларын өрескел бұзған қазақстандық жүргізушілерді ЖҚЕ-ні білу емтиханын қайта тапсыруға міндеттеуі мүмкін. ІІМ қандай бұзушылықтар туралы сөз болып отырғанын және білімін тексеруге жіберілген жүргізушіні не күтетінін нақтылады. Ведомство бұл ақпаратты Bizmedia.kz сұрауына жауап ретінде берді.
Бұл шара қайдан шыққан
Білімді қайта тексеру Қазақстанның ӘҚБтК-нің 53-бабында көзделген. Полицияның айтуынша, оның мақсаты — жолдарды қауіпсіз ету, жол-көлік оқиғаларының алдын алу және жүргізушілерді рульде жауапкершілікпен жүруге үйрету.
Не үшін қайта тапсыруға жіберуі мүмкін
Шара ӘҚБтК-нің бес бабының бірін бұзған жүргізушілерге қолданылуы мүмкін:
- 594-бап — қиылыстардан және жүру бөлігінің қиылысуынан өту қағидаларын бұзу;
- 596-бап — арнайы жарық және дыбыс белгілері қосулы жедел және арнаулы қызметтер көліктеріне қатысты көлік құралдарының орналасу қағидаларын бұзу;
- 598-бап — жүргізуші арнайы жарық және дыбыс белгілері қосулы жедел және арнаулы қызметтер көліктеріне жол бермеген;
- 599-бап — бағдаршамның тыйым салатын белгісіне немесе реттеушінің тыйым салатын ым-ишаратына қарамастан өту;
- 600-бап — жүргізуші басымдығы бар жаяу жүргіншілерге немесе басқа жол жүрісі қатысушыларына жол бермеген.
Автомектепке қайта бару керек пе
Жоқ. ІІМ түсіндіргендей, мұндай тексеру кезінде жүргізуші тек теориялық емтихан тапсырады. Жүргізу емтиханын тапсырудың қажеті жоқ, автомектепте қайта оқу да талап етілмейді.
Куәлікті алып қоя ма
Білімді тексеру — көлік құралын басқару құқығынан айыру емес. Жүргізуші куәлігі алынбайды және қайта берілмейді. Жүргізуші емтиханды сәтті тапсырса, нәтиже уәкілетті органның цифрлық жүйесіне енгізіледі, ал куәлік әдеттегідей жарамды бола береді — ешқандай қосымша рәсімсіз.
Bizmedia.kz материалдары бойынша